#বাৰে চহৰীয়া (৩)

#kathabandhub #manojkumardeka #manojdeka #culrure #tradition
#Jamugurihat #baresahariyabhawna 

...পোনতে মহাপুৰুষ দুজনাই জাতি উদ্ধাৰ আৰু জাতিৰ প্ৰাণ প্ৰতিষ্ঠাৰ দায়ত্ব ল'লে । হাতে কামে লাগিল । বাকী সকলে কৰিলে অনুকৰণ, অনুসৰণ । শিকিলে । গালে । নাচিলে । হৰিনাম অন্তৰত, আকাশত বিয়পি পৰিল । জাতিয়ে প্ৰাণভৰি উশাহ ল'লে ।

কিন্তু, কথাবোৰ লিখাৰ দৰে সহজ আছিল জানো ?! 

...নাছিল । কথাবোৰ লিখাৰ দৰে সহজ নাছিল ।
 
কাৰণ ? কাৰণ, বেছিভাগ মানুহ তেতিয়া সংস্কাৰী নাছিল । বেছিভাগ মানুহ সেই সময়ত আছিল মুক্তিৰ জটিল আৰু বৰ দীঘলীয়া পথৰ যাত্ৰী ।

তাকে দেখি মহাপুৰুষ দুজনাই আৰম্ভ কৰিলে- Mass Management Policy. মানুহক আকৰ্ষিত কৰিবলৈ অৰ্থবহ গীত লিখি গালে । বাদ্য সাজি বজালে । সুৰ সংগত কৰিলে । সুৰেৰে মানুহৰ আত্মাক নোৱাই ধুৱাই শান্ত কৰিলে । কিন্তু পেটটো ?

খালি পেটেৰে প্ৰায়ভাগ ভাল কামেই মানুহে ভাল কাম বুলি জানিও সমাপ্ত কৰিব নোৱাৰে । সেয়ে মহাপুৰুষ দুজনাই অন্ততঃ প্ৰসাদ এমুঠি দিয়াৰ ব্যৱস্থা গ্ৰহণ কৰিলে । প্ৰসাদত দিলে বাৰী ঘৰে উপলদ্ধ উপকাৰী আদা, চাউল । নিমখ । লগত কম, ফলমূল ।...ধূপ ধুনাৰ গোন্ধত পুৰঠ পবিত্ৰতা । অৰ্থবহ গীত, নাটৰ বচন, চৰিত্ৰৰ প্ৰকৃতিয়ে মানুহক বৈকুন্ঠ দৰ্শন কৰায় । অলপ ধতুৱা সকলো বহি ৰয় মাহ প্ৰসাদৰ মায়াত । মাহ প্ৰসাদৰ মহত্ব আছে !

-এই যে প্ৰসাদভাগ দিছিল, তাৰ লগত দিয়া চাউল কল আদা সকলো আছিল সহজে উপলদ্ধ । উপকাৰী । বাৰীয়ে ঘৰে পোৱা । ...অৰ্থাৎ, হৰি প্ৰাপ্তিৰ বাবে হাবাঙৰ পৰা কিবা বিশেষ আনি আগবঢ়ালেহে হব, তেনে চিন্তাৰ পৰা তেওঁ সমাজৰ দুৰ্বল শ্ৰেণীটোক মুক্ত কৰিছিল তেওঁলোকে । মহত্ব , দেৱত্ব প্ৰাপ্তিৰ বাবে সেৱাহে মূল । 

...বাৰেচহৰীয়া ভাওনা স্থলীৰ কেওফালে পিতপিতাই ফুৰাৰ সময়ত মই হঠাৎ লক্ষ্য কৰিলো- এজনে চাইকেল এখন থৈ হেণ্ডেতল ওলোমাই অনা মোনাটো উলিয়াই মাটিত থৈছে । মোনা উবুৰীয়াই দিছে । ...এগাল অমিতা ।

দুজন মানুহ বহি লৈছে । এজনে অমিতা কাটিছে । অমিতাৰ ভিতৰত কপাহী সূতা মেৰিয়াই লোৱা বাঁহৰ শাল সুমুৱাই দিছে । ...মই চাই আছো । মনত প্ৰশ্নৰ গজালি মেলিছে । মই সুধিছো । মোক হাঁহি হাঁহি কৈ গৈছে- "ভাওনাৰ সময়ত চাকি জ্বলোৱাৰ ব্যৱস্থা এয়া ।"

ৱাহ !...বাৰীয়ে ঘৰে উপলব্ধ অমিতা গছ- যি এই অসমত এবাৰলৈ হলেও, এটা হলেও ফল দিয়ে । তাৰেই চাকিগছি । সেই চাকিৰ পোহৰত আত্মাৰ আশা প্ৰত্যাশা, কান্দোন । পৰমাত্মাৰ বান্ধোন ।

আন এঠাইত দেখিলো, সৰু সৰু কলগছৰ পুলি তুলি কাটিছে ৪ফুট মান ওখত । এইবাৰ পুলিটোৰ আলু বা মুঢ়াটো খুলি তাক মস্ত এটা চাকিৰ ৰূপ দিছে । কল পুলিটো লুটিয়াই পুটিছে । আলু বা মুঢ়া খুলি সজা চাকি জ্বলিছে । ...মানুহ ভাগৱত প্ৰীতিত মচগুল হৈছে ।